बेळगाव : क्रीडाभारती अखिल भारतीय नियामक मंडळाच्या बैठकीसाठी बेळगावात आगमन झालेल्या मान्यवरांचे बेळगाव रेल्वे स्थानकावर क्रीडा भारती बेळगाव अध्यक्ष किरण जाधव यांनी उत्साहात स्वागत केले. पुष्पगुच्छ देऊन आणि हार घालून त्यांचा सत्कार करण्यात आला. कार्यकर्त्यांनीही मोठ्या संख्येने उपस्थित राहून मान्यवरांचे स्वागत केले.
शुक्रवारपासून मंडोळी रोड येथील साईराज लॉनच्या सभागृहात या महत्त्वपूर्ण बैठकीला प्रारंभ होत आहे. देशभरातील ५० हून अधिक महनीय व्यक्ती या बैठकीस उपस्थित राहणार असून क्रीडाभारती अखिल भारतीय महामंत्री राज चौधरी आणि क्रीडा भारती संघटन मंत्री प्रसाद महानकर यांची प्रमुख उपस्थिती राहणार आहे.
2036 साली भारतात होणाऱ्या संभाव्य ऑलिंपिक स्पर्धेच्या दृष्टीने खेळाडू आणि युवकांना सक्षम करण्यासाठी आवश्यक नियोजन, प्रशिक्षण व पायाभूत सुविधांवर या बैठकीत सखोल चर्चा होणार आहे. क्रीडाक्षेत्राच्या नियोजनबद्ध विकासासाठी बेळगावात आयोजित ही बैठक महत्त्वपूर्ण ठरणार असल्याचे आयोजकांनी सांगितले.