बेळगावातील हिंदू संमेलनात छत्रपती शिवाजी महाराजांच्या दक्षिण दिग्विजय मोहिमेचा इतिहास जिवंत
बेळगाव : संयुक्त महाराष्ट्र चौक, खडेबाजार येथे आयोजित हिंदू संमेलनात मंगळवारी मुख्य वक्ते डॉ. शिवरत्न शेटे यांनी छत्रपती शिवाजी महाराजांच्या दक्षिण दिग्विजय मोहिमेचा प्रेरणादायी इतिहास उलगडला. रायगडावरून दक्षिण दिग्विजयासाठी प्रस्थान करून महाराज भागानगर (आताचे हैदराबाद) येथे दाखल झाले, त्या ऐतिहासिक प्रसंगाचे प्रभावी वर्णन त्यांनी केले.
कुतुबशहा महाराजांना भेटण्यासाठी स्वतः येत असल्याचे समजताच, “आपण काका समान आहात, आपण आपल्याकडे येऊ,” असे म्हणत छत्रपतींनी दाखवलेली नम्रता आणि राजनैतिक दूरदृष्टी यावर डॉ. शेटे यांनी विशेष भाष्य केले. भागानगर महाराजांच्या स्वागतासाठी भव्यदिव्य सज्ज झाले होते. गॅलरीतून जनसमुदाय उत्सुकतेने हा ऐतिहासिक सोहळा पाहत उभा होता. ठिकठिकाणी रांगोळ्या, फुलांची सजावट आणि जल्लोषाचे वातावरण निर्माण झाले होते.
सुमारे ५० हजारांची भव्य फौज — त्यात २० हजार घोडदळ व ३० हजार पायदळ — अशा मराठा सैन्याच्या दिमाखदार आगमनाची कल्पनाच रोमांचकारी आहे, असे सांगत डॉ. शेटे यांनी उपस्थितांमध्ये उत्साह निर्माण केला. मराठ्यांच्या शौर्य, शिस्त आणि संघटनशक्तीचे हे प्रतीक असल्याचे त्यांनी नमूद केले.
या ऐतिहासिक कथनाने उपस्थित श्रोत्यांमध्ये अभिमानाची भावना जागृत झाली असून, कार्यक्रमाला मोठी उपस्थिती लाभली.