मागील वर्षी मे २०२५ मध्ये आपल्या शहराजवळील एका फार्महाऊसमध्ये अल्पवयीन मुलीवर सामूहिक बलात्कार झाल्याची धक्कादायक घटना उघडकीस आली. ही घटना इतकी अमानवी व क्रूर होती की, आपल्या आजूबाजूला असे काही घडू शकते यावर क्षणभर विश्वास बसणे कठीण झाले.
या प्रकरणात काही प्रभावशाली व्यक्तींचा सहभाग असल्याने ते दडपण्याचे प्रयत्न सुरू असल्याचे लक्षात येताच गप्प बसणे मला योग्य वाटले नाही. सत्य समोर यावे आणि पीडितेला न्याय मिळावा, या एकमेव उद्देशाने मी सार्वजनिकरित्या आवाज उठवला व माध्यमांची मदत मागितली.
मुद्रित व डिजिटल माध्यमांनी जबाबदारीची भूमिका घेतल्यामुळे पोक्सो कायद्यानुसार गुन्हा दाखल झाला. या प्रकरणाची जलदगती (फास्ट ट्रॅक) सुनावणी करत न्यायालयाने आरोपींना दोषी ठरवत कठोर शिक्षा सुनावली. हा निकाल न्यायव्यवस्थेवरील विश्वास अधिक दृढ करणारा आहे.
या त्वरित व ठोस न्यायासाठी मी न्यायालयाचे मनापासून अभिनंदन करते. हा निकाल केवळ एका प्रकरणापुरता मर्यादित नसून, संपूर्ण समाजाला दिलेला स्पष्ट आणि ठाम संदेश आहे.
ही घटना तरुण पिढीसाठी गंभीर इशारा आहे. कायद्याचा आदर, स्त्री व बालकांच्या सन्मानाचे भान आणि जबाबदार वर्तन ही प्रत्येक नागरिकाची जबाबदारी आहे. कायदा सर्वांसाठी समान आहे—कोणीही त्याच्या वर नाही.
न्याय मिळेपर्यंत अन्यायाविरुद्ध आवाज उठवणे, हेच सशक्त आणि जागरूक समाजाचे खरे लक्षण आहे.