“कर्नाटकातील दुसऱ्या क्रमांकाचा पर्यटन जिल्हा म्हणून बेळगावचा मान – 100 अधिकृत पर्यटन स्थळांचा टप्पा गाठला”

संपूर्ण बातमी :
कर्नाटकाच्या पर्यटन नकाशावर बेळगाव जिल्ह्याने नवा टप्पा गाठला आहे. 2024-29 च्या राज्य पर्यटन धोरणाअंतर्गत यावर्षी तीन नवे पर्यटन स्थळांचा समावेश झाल्यामुळे बेळगाव जिल्ह्यातील अधिकृत मान्यताप्राप्त पर्यटन स्थळांची संख्या 97 वरून 100 वर पोहोचली आहे. त्यामुळे कर्नाटकातील सर्वाधिक पर्यटन स्थळे असलेल्या जिल्ह्यांमध्ये बेळगावाने दुसऱ्या क्रमांकावर आपले स्थान पक्के केले आहे.

नवीन समाविष्ट पर्यटन स्थळे :

• त्रिकूटेश्वर मंदिर, वक्कुंड (बैलहोंगल) – मलप्रभा नदीने वेढलेले जैन मंदिर संकुल, जे एका बेटासारखे भासते. जुन्या गावाचे काही भाग पाण्याखाली गेले असले तरी मंदिराच्या परिसरात जैन प्रतिमा अद्याप सुरक्षित आहेत.
• शिवतीर्थ महाल, रायबाग – छत्रपती शाहू महाराजांचा उन्हाळी राजवाडा (1904–1911). येथे 26 एकरचा तलाव, अंबा भवानी व शिव मंदिरे आणि सूफी संत अबुताली यांचा दर्गा असून दुर्लक्षामुळे सध्या जीर्णावस्थेत आहे.
• कोळीगुड्डा, रायबाग तालुका – दसऱ्यात आनंद आश्रमाच्या पालखी उत्सवासाठी प्रसिद्ध तसेच कालिका देवी मंदिराजवळील 18 फूट उंच काळ्या ग्रॅनाइटची कालिकेची देखणी मूर्ती हे येथे मुख्य आकर्षण आहे.

विद्यमान पर्यटन आकर्षणे :
बेळगाव शहर व परिसरात बेळगाव किल्ला, कमल बस्ती, मिलिटरी महादेव व कपिलेश्वर मंदिरे, रामकृष्ण आश्रम, वीर सौधा, राजहंसगड किल्ला, सुवर्ण विधान सौधा, किल्ला तलाव, प्राणीसंग्रहालय, सेंट मेरीज चर्च, धर्मवीर संभाजी चौक यांसह अनेक वारसा स्थळे आहेत.

धबधब्यांमध्ये गोकाक, गोडचिनामलकी, सडा फॉल्स ट्रेक, चिकले धबधबा, चिगुळे व्ह्यूपॉईंट, धुपदाळ धरण पक्षी अभयारण्य, हिडकल व नवलुतीर्थ धरण, सोगल धबधबा, मार्कंडेय नदीखोरे, भीमगड अभयारण्य आणि कणकुंबी माऊली मंदिर परिसर निसर्गप्रेमींसाठी खास आहेत.

इतिहास-संस्कृती रसिकांसाठी कित्तूर किल्ला व संग्रहालय, संगोळ्ळी रायण्णा रॉक गार्डन, वीरा राणी चन्नम्मा स्मारक, पारसगड, सावदट्टी, सिरसंगी लिंगराज देसाई किल्ला, अशोक वन, हालशी भुवराह नरसिंह मंदिर, कमला नारायण मंदिर, एकसंबा बीरेश्वर मंदिर, चिंचली मायाक्का मंदिर, निडसोशी दुर्दुंडेश्वर मठ, अलकनूर करीसिद्धेश्वर मंदिर, मुगलकोड यल्लालिंगेश्वर मठ आणि रायबाग राजवाडा महत्त्वाचे ठरतात.

अध्यात्मिक स्थळांमध्ये रेणुका यल्लम्मा मंदिर (सौंदत्ती), पंचलिंगेश्वर (हुली), गोडची व यडूर येथील वीरभद्रेश्वर मंदिरे, मुगलखोड व अरभावी मठ, हब्बनट्टी हनुमान मंदिर, दक्षिण काशी कपिलेश्वर, चमत्कारी क्रॉस (नंदगड) अशी तीर्थक्षेत्रे आहेत.

इतर आकर्षणांमध्ये सेंट्रल व्हिलेज पॉटरी इन्स्टिट्यूट (खानापूर), नानावाडीतील साहसी क्रीडा सुविधा, कनेरी मठ, विराज जंक्शन (व्ही पार्क), अरभावी ध्यानधारणा, स्थानिक ऊस-द्राक्ष शेती अनुभव तसेच कित्तूर उत्सव, चिंचली जत्रा व यल्लम्मा देवी उत्सव अशा सांस्कृतिक मेळ्यांचा समावेश होतो.

इतिहास, निसर्ग, साहस आणि अध्यात्म यांचा संगम साधणारा बेळगाव जिल्हा आता अधिकृत “100 पर्यटन ठिकाणांचे आश्चर्य” म्हणून पर्यटक, साहसीवीर, इतिहासप्रेमी आणि निसर्गप्रेमी यांना आकर्षित करतो.