“बीजेपी विनाकारण आरोप करत आहे” – मंत्री शिवराज तंगडगी यांचा जोरदार हल्लाबोल
बेळगावी :
या महिन्याच्या 19 तारखेला राज्याचे मुख्यमंत्री सिद्धरामय्या नंदगड येथे विविध विकासकामांचे उद्घाटन करणार असून, त्या पार्श्वभूमीवर शुक्रवारी आपण नंदगड दौऱ्यावर जाणार असल्याची माहिती कन्नड व संस्कृती मंत्री शिवराज तंगडगी यांनी दिली. त्यानंतर कार्यक्रमाच्या रूपरेषांबाबत अधिकाऱ्यांसोबत चर्चा करण्यात येणार असल्याचेही त्यांनी स्पष्ट केले.
शुक्रवारी बेळगावी येथील सर्किट हाऊसमध्ये आयोजित पत्रकार परिषदेत बोलताना मंत्री तंगडगी यांनी भाजपवर तीव्र टीका केली. “केंद्रीय मंत्री प्रल्हाद जोशी यांना करण्यास काम नाही, म्हणून ते नॅशनल हेरॉल्डसारख्या विषयांवर बोलत आहेत. राज्यात भाजप तीन गटांत विभागली असून, द्वेषाचे राजकारण करण्यापलीकडे त्यांनी काहीच केलेले नाही,” असा आरोप त्यांनी केला.
देशासाठी भाजपने नेमकी कोणती देणगी दिली, असा सवाल उपस्थित करत त्यांनी महात्मा गांधींच्या नावावरूनही भाजपवर टीका केली. “प्रत्येक ग्रामपंचायतीत अन्याय करण्याचा भाजपचा प्रयत्न आहे. याविरोधात येत्या काळात देशभर आंदोलन छेडले जाईल,” असा इशाराही त्यांनी दिला.
मुख्यमंत्री बदलाच्या चर्चांवर प्रतिक्रिया देताना तंगडगी म्हणाले की, “या विषयावर चर्चा करण्याची गरज नाही. हायकमांडने राज्य सरकारला काम करण्याची पूर्ण संधी दिली आहे. भाजपकडे दुसरे काही काम नसल्यामुळे ते अपप्रचार करत आहेत.”
भाजप सत्तेत असताना बळ्ळारी, हुबळीसारख्या भागात लोकांमध्ये भीतीचे वातावरण होते, असा आरोप करत “आता विकासावर लक्ष द्यावे, निरर्थक आरोप थांबवावेत,” असे त्यांनी सांगितले. तसेच बेळगावी येथील कन्नड भवनाच्या व्यवस्थापनाबाबत चौकशी करून योग्य कारवाई केली जाईल आणि 150 वसतिगृहांची योजना राबवण्यात आल्याचेही त्यांनी स्पष्ट केले.
मुख्यमंत्री सिद्धरामय्या हे दिवंगत देवराज अरसू यांच्या पुढे एक पाऊल टाकत लोकाभिमुख व विकासाभिमुख प्रशासन देत असल्याचे सांगत, मागील भाजप सरकारने एकही ठोस विकासकाम केले नसल्याची टीकाही त्यांनी केली.
बैलहोंगल तालुक्यातील मरकुंबी येथे झालेल्या बॉयलर ब्लास्ट दुर्घटनेत मृत्युमुखी पडलेल्या आठ जणांच्या कुटुंबीयांना शासनाकडून चौकशी करून योग्य भरपाई दिली जाईल, असेही त्यांनी सांगितले.