बेळगाव जिल्ह्यातील कटकोळ पोलीस ठाणे हद्दीत झालेल्या भीषण अपघातात 23 वर्षीय दुचाकीस्वाराचा मृत्यू झाला आहे.
दि. 8 जून रोजी पहाटे सुमारे 4 वाजण्याच्या सुमारास लोकापूर-यरगट्टी मार्गावरील एम. चंदरगी गाव हद्दीत संजु हळी यांच्या शेताजवळ हा अपघात घडला. जीए-06 यू-0565 क्रमांकाच्या टाटा गुड्स ट्रकच्या चालकाने वाहन रस्त्यावर कोणतेही इशारा फलक किंवा सिग्नल न लावता वाहतुकीस अडथळा होईल अशा पद्धतीने उभे केले होते, असा आरोप आहे.
याचवेळी बागलकोटहून बेळगावकडे येत असलेले जगदीश रवी पवार (वय 23, रा. बम्मनगुड्डा तांडा, ता. हुनसगी, जि. यादगिरी) हे त्यांच्या बजाज पल्सर एनएस-125 (क्र. KA-33 EH-0607) दुचाकीवरून प्रवास करत होते. रस्त्यावर उभ्या असलेल्या ट्रकच्या मागील लोखंडी भागाला त्यांची दुचाकी जोरदार धडकली.
या अपघातात जगदीश यांच्या डोक्याला व डाव्या पायाला गंभीर दुखापत झाली असून त्यांचा मृत्यू झाला.
या प्रकरणी कटकोळ पोलीस ठाण्यात गुन्हा क्रमांक 111/2026 नोंद करण्यात आला असून भारतीय न्याय संहिता (BNS) 2023 च्या कलम 285 व 106(1) अंतर्गत गुन्हा दाखल करून पुढील तपास सुरू आहे.