बेळगाव : बैलहोंगल तालुक्यातील दोडवाडा गावाजवळ आढळलेल्या संशयास्पद मृत्यू प्रकरणाचा उलगडा करत दोडवाडा पोलिसांनी खुनाच्या गुन्ह्यात तीन आरोपींना अटक केली आहे. आरोपींना न्यायालयासमोर हजर करण्यात आले असून त्यांना न्यायालयीन कोठडी सुनावण्यात आली आहे.
मृताची ओळख फक्किरप्पा मल्लाप्पा किरकासली (वय ३८) अशी झाली आहे. २९ मे रोजी दोडवाडा गावाजवळील शेतातील चिंचेच्या झाडाखाली त्यांचा मृतदेह आढळून आला होता. सुरुवातीला संशयास्पद मृत्यू म्हणून नोंद करण्यात आलेल्या या प्रकरणाचा तपास करताना हा खून असल्याचे निष्पन्न झाले.
तपासात समोर आलेल्या माहितीनुसार, फक्किरप्पा यांनी मेंढ्या राखण्याच्या कामासाठी आरोपींकडून आगाऊ रक्कम घेतली होती. त्यानंतर कामाच्या कारणावरून वाद निर्माण झाला. २८ मे रोजी रात्री मद्यधुंद अवस्थेत झालेल्या बाचाबाचीचे रूपांतर हाणामारीत झाले. यावेळी आरोपींनी मारहाण करून कुऱ्हाडीने हल्ला करत फक्किरप्पा यांचा खून केल्याचा आरोप आहे.
या प्रकरणी हलप्पा सहदेवप्पा जावली (२४), मंजुनाथ पुंडलिकप्पा तळवारा (२८) आणि अर्जुन लक्कप्पा चुनप्पा (२५) यांना अटक करण्यात आली आहे. दोडवाडा पोलिस ठाण्यात भारतीय न्याय संहितेअंतर्गत गुन्हा दाखल करण्यात आला आहे.
बेळगाव जिल्ह्याचे अतिरिक्त पोलीस अधीक्षक, बैलहोंगल उपविभागीय पोलीस अधिकारी, कित्तूर सीपीआय आणि दोडवाडा पोलिसांच्या विशेष पथकाने संयुक्त तपास करून गुन्ह्याचा छडा लावला. आरोपींना अटक करणाऱ्या पोलिस पथकाचे जिल्हा पोलीस अधीक्षक के. रामजन यांनी कौतुक केले आहे.