बेळगाव : वृद्ध व्यक्तीची देखभाल करण्यासाठी ठेवलेल्या व्यक्तीनेच विश्वासघात करत घरातील लाखो रुपयांच्या सोन्याच्या दागिन्यांची चोरी केल्याचा धक्कादायक प्रकार उघडकीस आला आहे. कॅम्प पोलीस ठाण्याच्या पोलिसांनी या प्रकरणाचा अवघ्या काही दिवसांत छडा लावत दोन आरोपींना अटक केली असून, चोरीस गेलेले दागिनेही जप्त करण्यात आले आहेत, अशी माहिती शहर पोलीस आयुक्त भूषण बोरसे यांनी पत्रकार परिषदेत दिली.
अटक करण्यात आलेल्या आरोपींची नावे राहुल कांबळे आणि बाबासाहेब काटगेरी अशी आहेत. विश्वनाथ नावाच्या वृद्ध व्यक्तीच्या प्रकृतीची काळजी घेण्यासाठी राहुल कांबळे याला त्यांच्या मुलांनी घरी ठेवले होते. घरात नियमित वावर असल्यामुळे राहुलने तिजोरीतील सोन्याच्या दागिन्यांची माहिती मिळवून हळूहळू चोरी करण्यास सुरुवात केली.
गेल्या तीन महिन्यांपासून कोणालाही संशय न येऊ देता त्याने तिजोरीतून सोन्याचे दागिने लंपास केले. तपासात सुमारे ९३० ग्रॅम वजनाचे तब्बल ७३.३० लाख रुपयांचे सोन्याचे दागिने चोरीला गेल्याचे समोर आले.
या चोरीतील दुसरा आरोपी बाबासाहेब काटगेरी याने हे दागिने मुथूट फायनान्समध्ये गहाण ठेवून पैसे उचलल्याचे तपासात स्पष्ट झाले. कॅम्प पोलिसांनी तांत्रिक माहिती आणि ठोस पुराव्यांच्या आधारे दोन्ही आरोपींना अटक करून चोरीचा मुद्देमाल जप्त केला आहे.
घरात मोठ्या प्रमाणात सोन्याचे दागिने न ठेवता ते बँकेच्या लॉकरमध्ये सुरक्षित ठेवावेत, असे आवाहन पोलीस आयुक्त भूषण बोरसे यांनी नागरिकांना केले. या गुन्ह्याचा जलद छडा लावणाऱ्या कॅम्प पोलीस ठाण्याच्या अधिकारी व कर्मचाऱ्यांचे त्यांनी कौतुक केले असून, विशेष कामगिरी करणाऱ्या पोलिसांना विभागाकडून बक्षिसे दिली जाणार असल्याचेही त्यांनी सांगितले.
यावेळी डीसीपी नारायण बारामणी, निरंजन राजे आरस यांच्यासह अन्य वरिष्ठ अधिकारी उपस्थित होते.