कागवाड: कागवाड-शिरगुप्पी मार्गावर एनडब्ल्यूकेएसआरटीसी बस आणि दुचाकी यांच्यात झालेल्या भीषण अपघातात एका दुचाकीस्वाराचा जागीच मृत्यू झाल्याची दुर्दैवी घटना मंगळवारी सकाळी घडली.
पोलिसांनी दिलेल्या माहितीनुसार, 2 जून 2026 रोजी सकाळी सुमारे 10.20 वाजण्याच्या सुमारास कागवाड हद्दीतील कागवाड-शिरगुप्पी रस्त्यावर हा अपघात झाला. केए-23/एफ-1256 क्रमांकाची एनडब्ल्यूकेएसआरटीसी बस अथणी डेपोचा चालक संगप्पा नेजप्पा गणी (रा. मनगोळी) हा कागवाडहून शिरगुप्पीकडे जात असताना भरधाव व निष्काळजीपणे बस चालवत होता. यावेळी समोरून येणाऱ्या दुचाकीला त्याने जोरदार धडक दिल्याचा आरोप आहे.
या अपघातात विठ्ठल बसप्पा अक्कीमरडी (वय 50, रा. निडगुंदी, ता. रायबाग) हे गंभीर जखमी झाले. त्यांच्या डोक्याला व उजव्या पायाला गंभीर दुखापत होऊन त्यांचा घटनास्थळीच मृत्यू झाला.
घटनेनंतर कागवाड पोलिस ठाण्यात बस चालकाविरुद्ध गुन्हा क्रमांक 156/2026 अंतर्गत बीएनएस 2023 कलम 281 व 106(1) नुसार गुन्हा दाखल करण्यात आला असून पुढील तपास सुरू आहे.
या अपघातामुळे निडगुंदी गावात शोककळा पसरली असून अक्कीमरडी कुटुंबावर दुःखाचा डोंगर कोसळला आहे.