नवरत्न सन्मानाने…श्री गणेश फेस्टिवलची उत्साहात सांगता .

बेळगाव – गेली 24 वर्ष सुरू असलेल्या आणि बेळगावच्या सार्वजनिक गणेशोत्सवाला नवी विधायक दिशा देणाऱ्या श्री गणेश फेस्टिवल सोहळ्याचा आज समारोप झाला. आज शुक्रवारी सायंकाळी गुड शेड रोड येथील श्री माता सभागृहात आयोजित करण्यात आलेल्या नवरत्न सत्कार सोहळ्यात, विविध क्षेत्रात उल्लेखनीय कामगिरी केलेल्या नवरत्नांचा मान्यवरांच्या हस्ते सत्कार करण्यात आला.

मंगळवार दिनांक 19 ऑगस्ट पासून यावर्षीच्या श्री गणेश फेस्टिवलला सुरुवात झाली होती. गेले तीन दिवस होम मिनिस्टर,महिलांच्या स्पर्धा तसेच जागर लोकसंस्कृतीचा आदी कार्यक्रम गणेश भक्तांच्या उदंड प्रतिसाद पार पडले. आज गणेश फेस्टिवलच्या अंतिम दिवशी नवरत्न सन्मान सोहळ्याचे आयोजन करण्यात आले होते. यावर्षी संतोष दरेकर (समाजसेवक),मीरा तारळेकर (साहित्यरत्न), वैभव लोकूर (नाट्यभूषण),सीमा कुलकर्णी (संगीतरत्न), सतिश लाड (उद्योगरत्न),राम पवार (क्रीडा रत्न), अनिता राऊत (श्रमसेवा),आशा नाईक (कृषिरत्न) व सामाजिक संस्थेचा पुरस्कार दुर्गवीर प्रतिष्ठान ला बहाल करण्यात आला.

गणेश फेस्टिवल समितीचे अध्यक्ष मनोहर देसाई, संजीव नेगिनहाळ, मनोरमा देसाई, ज्योती अग्रवाल, डॉ. मीना पाटील,प्रतिभा नेगिनहाळ, महेश वस्रद,अश्विनी चंद्रशेखर,श्रीकांत काकतीकर, विलास अध्यापक व अन्य मान्यवरांच्या हस्ते नवरत्नांना शाल, पुष्पगुच्छ, श्रीफळ,प्रशस्तीपत्र व स्मृतीचिन्ह देऊन सन्मानित करण्यात आले.यावेळी सत्कारमूर्तींनी आपल्या कार्याला उजाळा देताना सन्मानाप्रती कृतज्ञता व्यक्त केली.

कार्यक्रमाच्या प्रारंभी मनोहर देसाई, अभिजीत चव्हाण सुनील पाटील यांच्या हस्ते गणेश पूजन करण्यात आले.उपस्थितांचे स्वागत आणि प्रस्ताविक मनोहर देसाई यांनी केले.आभार श्रीकांत काकतीकर यांनी मानले. सूत्रसंचालन वसुंधरा सांबरेकर यांनी केले. कार्यक्रमाला श्री माता सोसायटी, श्री राजमाता सोसायटी, श्री भक्ती सोसायटीचे संचालक पदाधिकारी, ज्ञानमंदिर इंग्रजी शाळेच्या शिक्षिका कार्यकारी वर्ग तसेच गणेश भक्तांनी मोठी उपस्थिती दर्शविली.